Need a skilled interpreter, not an infallible one — sense has light in the text itself

XLIV. Itaque ut fideles verum Scripturae sensum in multis assequantur, & uberem fructum ex ea capiant, opus habent quidem interprete, sed non interprete qui errare non possit, ut dicunt Pontificii, verum interprete sagaci & perito. At, postquam illis praeivit ejusmodi interpres, Scripturae sensum tenent, & de eo certi sunt, non propter authoritatem, sive interpretis, sive traditionis, quam ex interprete suo didicerunt: sed propter vim & lucem veritatis, quam jam in rebus ipsis agnoscunt & animadvertunt, si quidem mentem, ut decet, Spiritus sancti virtute purgatam, & illuminatam habeant. Quemadmodum qui student Philosophiae & literis humanioribus per se statim non possunt intelligere textum Aristotelis, & Horatii vel Juvenalis Satyras, sed ad opera praeceptoris & magistri. Et tamen postquam verus, vel Poetae, vel Philosophi sensus ipsis indicatus & expositus est, illum jam proprio judicio discernunt & vident in ipso authore: Nec de eo persuasi sunt propter solam magistri sui authoritatem. Etenim sicut sensus Poematum Horatii & Aristotelici textus ex se incertus & dubius non est, donec accedat aliqua externa authoritas, quae super eo pronunciet, sed ex ipsis authorum verbis atque operum contextura certo deprehendi potest, modo debite expendantur: ita quoque verus Scripturae sacrae sensus habet in ipso textu propriam lucem, & sui argumenta atque probationes quibus innotescere possit, nec est per se vagus & indeterminatus donec accedat authoritas traditionis non scriptae, vel judicii Ecclesiastici quae illum certo modo limitet & coarctet.