Baron of Aberdeen: four senses of fiducia — persuasion, rest, fortitude, peace

LVIII. Sed omnium accuratissime mentem suam hac de re exponit Robertus Baronius Scotus, dum viveret, in Academia Aberdonensi Professor. Ac ne quid hic supersit obscuritatis & ambiguitatis, distinguit multiplices fiduciae acceptiones, & quatuor hujus vocis significata enumerat. Fiducia, inquit, primo modo accipitur, pro firma persuasione, seu pro firmo & stabili judicio intellectus, quo apud nos statuimus, & propter Dei testimonium in verbo suo credimus, Dominum nostrum Jesum Christum, pretioso suo sanguine nos redemisse, & Deum patrem propter ejus meritum, omnia nostra peccata remisisse; eundem etiam, propter illud Christi meritum & sacrificium in cruce oblatum, liberaturum nos ab omnibus hujus vitae miseriis & calamitatibus, & tandem donaturum nos ineffabili illius gloriae aeternitate. Secundo accipitur pro intima acquiescentia in divina benevolentia & gratia, per quam toti ab illa pendemus, non aliunde auxilium salutemve exspectantes. Tertio pro spirituali fortitudine & animositate, qua animi nervos & robur opponimus malis & periculis, sive temporalibus, sive spiritualibus, cum quibus in hac lacrymarum valle conflictamur. Quarto pro pace, tranquillitate, & quasi serenitate conscientiae, seu securitate spirituali, quae quietem a servili timore importat.