Some Protestants make forensic sense perpetual; most allow real change

VI. Porro hanc perpetuam esse vocis justificandi in Scriptura sacra significationem, neque unquam illa designari realem immutationem, per quam aliquis ex impio justus sanctusque efficitur, affirmant quidam inter Protestantes. Sed plerique aliter sentiunt, & meo quidem judicio, magna cum ratione. Nam verbum istud in aliquot Scripturae locis non, nisi dure & coacte admodum, potest admittere sensum illum forensem, neque justificari significat solum justum declarari, vel pronunciari, sed revera pium justumque fieri. Talis est omnium fere judicio locus qui habetur apud Danielem, cap. 12. Qui docti fuerint fulgebunt quasi splendor firmamenti; & qui justificant multos, quasi stellae in perpetuas aeternitates. Ubi per eos qui multos justificant, non intelliguntur illi qui multos justos habent, sive declarant, sed, ut habet versio Vulgata, qui ad justitiam erudiunt multos; aut, ut vertit nostra vernacula, qui ad justitiam multos introducunt: adeo ut justificare idem ibi sit quod justum reddere doctrina & exemplo vitae.