Yet public hymns and litanies ask Mary to pity, free, and give goods—not merely to pray

LIII. Veruntamen in publico Ecclesiae cultu, orationes multae ad Sanctos diriguntur, in quibus non simpliciter rogantur, ut pro nobis orent, sed ut nostri misereantur, nosque liberent a malis corporis & animae, ac ea bona quibus egemus donent. Sic in hymno qui incipit, Lux Mundi Beatissima, haec ad Beatam Virginem dicuntur: Te adesse deposcimus, Supplicibus nunc vocibus, Jam veni dulcis Domina, Nostra tolle incommoda, Dona confer caelestia. Et in hymno, Ave Maris Stella, ad eandem haec habetur Oratio, Virgo singularis, Inter omnes mitis, Nos culpis solutos, Mites fac & castos. Vitam praesta puram, Iter para tutum, Ut videntes Jesum, Semper collaetemur. In hymno quoque Memento salutis author haec leguntur, Maria Mater gratiae, Mater Misericordiae, Tu nos ab hoste protege, Et hora mortis suscipe. Denique in Antiphona, Alma Redemptoris mater, sic compellatur eadem Maria, Virgo prius ac posterius, Gabrielis ab ore Sumens illud Ave, peccatorum miserere. In Litaniis vero, non usu publico Ecclesiae Rom. receptis, sed Bonaventurae Psalterio adjectis, & in usum plebis Romanae editis, postquam saepius Beatae Virgini sub variis titulis & Elogiis invocatae dictum est, Ora pro Nobis, tandem illi quoque dicitur Propitia esto, Parce nobis Domina, Ab omni malo, libera nos Domina, Ab ira Dei & indignatione ejus, A periculosa desperatione, A superbia praecipitante, A luxuria deturbante, &c. Libera nos Domina. Veni, Peccatores, Te rogamus Audi nos, Ut Sanctam Ecclesiam piissima Domina conservare digneris, Te Rogamus audi nos. Denique dicitur illi Mater cum Filio tuo sanctissimo, Miserere nobis, Mater charissima Domina, Miserere nobis. In Psalterio Dominae nostrae Gallice edito Parisiis apud Claudium Chappelet Anno 1601.