XVIII. Neque putandum est Deum res quidem magnas, & alicujus momenti, ut stellas, sigillatim nosse, scientiam vero illius fugere multitudinem & numerum rerum parvarum & vilium: quasi non deceret intellectum divinum ad earum singulas seorsim advertere. Id existimasse videtur Hieronymus scribens in Prophetiae Abacuc caput primum, Absurdum est, inquit, ad hoc Dei deducere majestatem, ut sciat per momenta singula quot nascantur culices, quotve moriantur: quae cimicum, & pulicum, & muscarum sit in terra multitudo: quanti pisces in aqua natent, & qui de minoribus majorum praedae cedere debeant.