XVIII. Quod spectat autem illos qui inter Protestantes singulari nomine Reformati dicuntur, eorum plurimi voce praedestinationis significant totam illam providentiae divinae partem, qua Deus apud se ante mundum conditum decrevit & statuit ea quae singulorum hominum, vel aeternam salutem, vel interitum & exitium spectant. Ac proinde aeternam Dei praedestinationem distinguunt, in eam quae est ad vitam & salutem, & in eam quae est ad mortem & exitium. Et prior illa est quae communiter Electio, posterior quae Reprobatio in Scholis appellatur. Sic utuntur voce praedestinationis Zanchius, Beza, Ursinus, Perkinsus, Polanus, Bucanus, & alii complures, ac ipsa quoque Synodus Dordracena.