Annotatio V §.I open: Manducatio propria vs impropria — physical eating into mouth and stomach

ANNOTATIO V. De Manducatione Corporis Christi Orali. §. I. MANDUCATIO, actionem quandam designans, vel Propria est, vel Impropria. PROPRIA est actio Physica, seu naturalis, consistens in assumptione esculenti alicujus Corporalis, seu propriè sic dicti, in os corporis, demissioneque ejusdem in stomachum. Unde ad propriè dictam Manducationem hæc Tria, tanquam essentialia, requiruntur (1) Esculentum Corporale, ceu Objectum actionis (2) Duplex Actio Corporalis circa objectum, quarum Prior esculenti corporalis assumptione, seu receptione in os; Posterior demissione ejus in stomachum absolvitur. Utraque actio ad Manducationem propriè sic dictam, æquè necessaria: neque enim ille propriè manducare, i. e. physicè edere dicitur, qui esculentum in os solummodò recipit, mox idem ex ore emissurus, sed is demum, qui receptum in os esculentum, etiam per guttur in stomachum demittit.