XLIII. Itaque non aliam fidem justificare docent, quam illam qua, non tantum Deo, sed etiam in Deum credimus, id est, quae junctam habet fiduciam in Deum, & spem veniae ab eo obtinendae. Unde nascitur Dei amor & dilectio, ut colligere est ex ipso Concilio Tridentino, sess. 6. cap. 6. Disponuntur autem, inquit, ad ipsam justitiam, dum excitati divina gratia, & adjuti, fidem ex auditu concipientes, libere moventur in Deum, credentes vera esse quae divinitus revelata & promissa sunt, atque illud in primis, a Deo justificari impium per gratiam ejus, per redemptionem, quae est in Christo Jesu; & dum peccatores se esse intelligentes, a divinae justitiae timore, quo utiliter concutiuntur, ad considerandam Dei misericordiam se convertendo, in spem eriguntur, fidentes Deum sibi propter Christum propitium fore, illumque tanquam omnis justitiae fontem, diligere incipiunt, &c.