XLI. Igitur eo redire videtur controversia quae hic inter Protestantes & Romanenses intercedit, An scilicet, certitudo quam fideles Christi gratiae participes habere possunt & debent de sua coram Deo justificatione, sit certitudo Fidei divinae; An vero solum certitudo alterius generis, & alio nomine vocanda. Prius affirmant communi consensu Protestantes: posterius, paucissimis exceptis, Schola Romana, juxta quam ista certitudo non est fidei, sed spei, seu fiduciae, cui competit certitudo certitudine fidei inferior, moralis, scilicet, vel conjecturalis, quae aliquid minus est quam certitudo moralis stricte dicta, quae gravi prorsus argumento & authoritate nititur, cum conjecturalis ex signis probabilibus colligatur; quanquam certitudo illa conjecturalis saepe latiori sensu moralis etiam dicitur.