Gilbert of Poitiers exploded — Person/nature not split names in God.
Latin
XXI. Idcirco nominibus abstractis & concretis in Deo res una plane, & eadem significatur. Nam Deus est sua essentia, & essentia Dei est Deus ipse. Homo non est humanitas, nec humanitas est homo: sed Deitas est Deus, & Deus est Deitas. Ac similiter quodcunque Divinum attributum, tam in abstracto quam in concreto de Deo recte & vere enunciari potest. Etenim Deus non tantum est bonus; sed etiam ipsa bonitas: nec tantum justus; sed ipsa justitia. Qui loquendi modus authoritate Scripturae comprobatur. Siquidem Filius Dei frequenter in Scripturis vocatur sapientia. Et non solum dicitur Deus verus: sed ipsa veritas: nec solum Deus vivens: sed ipsa vita, veluti Joan. 14. Ego sum, inquit, veritas & vita. Quapropter in scholis merito explosa est sententia Gilberti Porretani Episcopi Pictaviensis, qui tempore Bernardi docuit non eandem rem in Deo significari nominibus abstractis & concretis: ut hisce vocibus Deus & Deitas, Persona & natura. Adeoque hac etiam in parte Deus est omnino simplex & compositione caret.